Su'aasha iswaydiinta mudan ayaa ah, ardaydaas markay jaamacadaha dhameeyaan ma yihiin kuwa leh aqoontii lasoo baray mudadii ay jaamacadda dhiganayeen? Ma yihiin kuwa leh tayo fiican oo naftooda iyo dadkoodaba ku anfici kara waxa ay soo barteen?
Si aan uga jawaabno su'aalahaas waxaan u baahan nahay inaan soo ogaanno xaqiiqada ka jirta jaamacadaha dalka iyo waaqaca dhabta ah ay ardayda wax ku bartaan.
Sida aan wada ognahay ardayda dhigata jaamacadaha marka ay bilaabaan semester cusub waxaa loo qaybiyaa kooxa kooxo (Groups), koox walba waxa ay iska dhax doorataa qof hogaamiye u noqda (Group Leader), ujeedka laga lee yahay samaynta kooxahaas ayaa ah inay ardayda iskaashadaan oo ay isla qaybsadaan culayska shaqooyinka iyo waajibaadka loo diro, balse nasiib xumo arinku sidaas ma ahan!
Waxaa hubaal iyo xaqiiqo ah shaqooyinka ardayda loo diro (Activities) inay wax badan ka muhiimsan yihiin kana wax tar badan yihiin casharadda ay ardaydu sida caadiga ah u qaataan, waxaana ka mid ah faa'iidooyinka tirada badan ee laga helo kuwaan hoos ku qoran:
Kobcidda maskaxda ardayga iyo helidda aqoon dheeri ah.
Mar walba oo uu ardaygu isku taxalujiyo inuu soo qabto shaqooyinkii loo diray sida haddii ay noqon lahayd inuu internet-ka wax kasoo baaro iyo wixii la mid ah waxaa kordhaya garaadkiisa aqooneed, sababtoo ah internet-ka waxa uu ka helayaa macluumaad badan oo la xariira waxa uu baarayo.
Fahmidda iyo la jaanqaadidda technology-yada.
Waxaa ardayga u fududaanaysa inuu fahmo technology-yada oo ah halka uu maanta aduunka usii weeycanaayo, sida inuu fahmo qaabka loo adeegsado Computer-ka, kaas oo aan ognahay muhiimada iyo miisaanka uu u lee yahay ardayda, hadii ay noqon lahayd qaabka wax loogu qoro, qaabka internet-ka wax looga daalacdo iyo wixii la mid ah.
Kobcidda hab qoraalka ardayga.
Mar walba uu ardaygu sameeyo cilmi baaris waxaa hormaraya hab qoraalkiisa, wuxuuna fahmayaa shuruucda iyo hab raacyada uu qoraalku lee yahay.
Hadaba marka la sameeyo kooxaha aan soo sheegay ee shaqo la isku diro, sida in mowduuc hebal lasoo baaro (research), ama in wax lasoo jeediyo (Presentation) waxaa inta badan 99% dusha saarta dhammaan shaqooyinka la isku diray qofka hogaamiyaha ah, asaga ayaa soo diyaariya kadibna shaqadii oo lasoo qabtay ayaa loo keenaa kooxda inteeda kale. Marka laga reebo halkaas qof ee wax soo qabtay inta kale waa ku dulnoolayaal waana magac u yaal oo wax shaqo ah ma qabtaan.
Kasoo qaad fasal walba inuu ka kooban yahay 50 arday, u qaybi 5 kooxood oo koox walba ay ka kooban tahay 5 qof, waxay noqonaysaa fasalku inuu yeesho 10 kooxood, koox walba sidaan horay usoo sheegay waxay leedahay hogaamiye, taas oo la macno ah inuu fasalku yeesho 10 hogaamiye.
10 kaas hogaamiye ee aan horay kusoo xusay inay yihiin kuwa inta badan qabta shaqooyinka loo diro kooxaha, matalaadda ay fasalka ku leeyihiin marka loo fiiriyo tirada guud ee ardayda waa 20%. Hadaba tirada soo hartay oo ah 80% waxa ay noqonayaan magac uyaal, door kuma lahan kamana qayb qaataan howlaha muhiimka u ah ee la isku diray, waana kuwa had iyo jeer dhibanayaasha ah ee aan is ogayn lanana ogayn ee igu kalifay inaan qoro qormadaan.
MAXAA KA DHALAN KARA?
Ardayga marka uu iska indha tiro kana qayb qaadan waayo shaqooyinka la isku diro waxaa dhacaysa muddo kadib marka uu jaamacadda dhameeyo inuu noqdo qof aan lahayn wax xirfad ah iyo aqoon wayn oo la taaban karo, sidoo kale waxa uu ka caaganaan doonaa dhammaan faa'idooyinkii aan kor kusoo sheegay.
Waxaa dhacaysa hadana jirta in la arko qof jaamici ah oo shahaado jaamacadeed wata hadana aanan aqoonin wax yaabaha asaasiga ah ee la rabo qof walba oo jaamacad soo dhigtay inuu yaqaanno.
TALO BIXIN
Hadii aad tahay arday hadda dhigta jaamacad fursadna aad u heshay inay kusoo gaarto qormadaan, fadlan naftaada ku kalsoonoow iskuna day inaad qabato shaqa walba ee laguu diro, waxaa ku jira dantaada iyo hormarka naftaada.
Comments
Post a Comment